أكد النجم طارق لطفى أن الفن هو أكبر وأعظم القوى الناعمة، وتصديره بمثابة مكسب كبير لنشر الثقافة المصرية بمختلف الدول، موضحا أن قوة تأثيرك في باقى الدول تأتى من كثرة تصديرك للفن لها.
وقال لطفى في مداخلة هاتفية لتليفزيون اليوم السابع: "أنا زعلت أوى أوى لما روحت تونس، ولقيت الأجيال الجديدة مش فاهمة اللهجة بتاعتنا المصرية، أي حد هناك معدى الأربعين سنة هو فاهم اللى أنت بتقوله، لكن الأجيال الصغيرة حاليا هناك مش فاهمين لهجتنا وده بسبب قلة تصديرنا للفن المصرى هناك".
وأضاف لطفى قائلا: "تصدير الفن المصرى كان عنصر أساسى هناك في تونس، أنت كنت هناك بتسمع الغناء المصرى بجانب الغناء التونسى، وكنت بتتفرج هناك على فيلم مصرى أو مسلسل مصرى لإن ماكانش فيه غيرهم.. وعلى فكرة المدرسة الفنية التونسية دلوقتى عظيمة ومتطورة جدا على الرغم من قلة إنتاجهم".
وتابع لطفى حديثه لتليفزيون اليوم السابع قائلا: "أنا زعلت واتضايقت جدا، لإن كدة أنا كفنان مصرى مابقتش مؤثر ثقافيا.. ودى سلعة مهمة جدا ومؤثرة جدا.. وأنا شايف إننا نهتم بالأسواق دى دلوقتى حتى لو مش هتجيبلنا دخل.. لكن التأثير الثقافى قوة كبيرة ومهمة.. فيه دول بتحتل دول عشان تفرض ثقافتها".
التعليقات