تحدث الفنان الكبير خالد محمود عن تفاصيل المكالمة التى جمعته بالنجم أحمد العوضى، حيث قال في مداخلة هاتفية لتليفزيون اليوم السابع: "فى أول المكالمة الفنان أحمد العوضى قالى أنت هترجع الدراما بشكل محترم جدا وبشكل يليق بيك.. أنا ما اعرفش ملامح الدور لإن المؤلف لسة بيكتب.. أنا واثق في العوضى لإن قالى هرجعك بشك يليق بيك والنقطة دى اللى خلتنى أعتذر عن أعمال كتير الفترة الماضية وده اللى خلانى على مدار 9 سنين مهتم بالمسرح، وشاركت في مهرجانات مسرحية كتير بره مصر وخلال الفترة دى عملت حوالى 4 أو 5 مسلسلات منهما "ظل الرئيس"، والقاصرات ولحم غزال ونقل عام".
وأضاف محمود في تصريحاته لتليفزيون اليوم السابع: "أتعرض عليا بقى حاجات تانية بس قولت مش ده اللى يرجع بيه خالد محمود للناس.. لكن وعدنى العوضى بإن دور يليق بيا، وهو فنان جميل ومتابعنى من زمان وبيحبنى جدا..وأنا بعشقه وده خلاله كلام ثقة بالنسبة لى إن هيقدمنى في دور لا يقل أهمية عن أدوار مهمة قدمتها من قبل".
وتابع محمود حديثه قائلا: "العوضى عشان مدرك إن ما بعملش غير فن هادف، وهو وعدنى بالحتة دى وطالما أنا بثق فيه كنجم وهو بيثق فيا كممثل بيحبه فخلاص حصلت الثقة وتمت الموافقة على طول على العمل".
وتحدث محمود عن سبب إعتذاره عن العديد من الأعمال الفنية، حيث قال الموضوع بالظبط إذا وافقت على عمل لازم أقدم رسالة من خلاله، لإن الفن من أهم علاماته إنه بيغير وبيؤثر في وجدان الناس فيا أقدم رسالة ليها معنى وليها هدف يا ما أقدمش.. واللى كان بيتعرض عليا يا أما حاجة مقررة عملتاه قبل كدة.. أو حاجة ما ينفعش أقدمها للناس وعشان كدة كنت بعتذر.. اللى كان بيجيلى كويس زى ظل الرئيس كنت بعمله والمسلسل ده بالفعل نجح جدا زى مسلسلات كتير شاركت فيها زى "الحقيقة والسراب"، وزى "يتربى فى عزو"، وزى "محمود المصرى"، أعمال لا يمكن أن تنسى أبدا".
التعليقات